تحریر: مولانا سید کرامت حسین شعور جعفری
حوزہ نیوز ایجنسی| ذرا غور کیجیے! جب کوئی ذاکر یا خطیب منبر پر بیٹھتا ہے تو اس کے سامنے محض چند سامعین نہیں ہوتے، بلکہ ایسے انسان ہوتے ہیں جو اپنی زندگی کے قیمتی لمحات اس کی گفتگو سننے کے لیے وقف کرتے ہیں۔ وہ اپنا وقت نکالتے ہیں، اپنی مصروفیات ترک کرتے ہیں اور اس امید کے ساتھ مجلس میں حاضر ہوتے ہیں کہ یہاں سے انہیں کچھ علم حاصل ہوگا، کوئی نئی بات سمجھنے کو ملے گی یا کوئی نصیحت ان کی زندگی میں بہتری کا سبب بنے گی۔ اس اعتبار سے منبر پر بیٹھنے والا شخص صرف گفتگو کرنے کی ذمہ داری نہیں اٹھاتا، بلکہ سیکڑوں اور ہزاروں انسانوں کے وقت اور اعتماد کا امین بھی ہوتا ہے۔
موجودہ دور میں صورتِ حال مزید تبدیل ہو چکی ہے۔ مجالس اب صرف امام بارگاہوں اور مساجد تک محدود نہیں رہیں، بلکہ ایک خطاب آن لائن نشر ہونے کے بعد سوشل میڈیا کے ذریعے دنیا کے گوشے گوشے تک پہنچ جاتا ہے۔ چنانچہ خطیب کے سامنے بیٹھے سامعین کے علاوہ دور دراز علاقوں میں اسے سننے والے بے شمار افراد بھی اس کی گفتگو سے وابستہ ہوتے ہیں۔ ایسے میں ہر صاحبِ منبر کو اپنے ضمیر سے یہ سوال ضرور کرنا چاہیے کہ جو لوگ اپنا قیمتی وقت مجھے سننے کے لیے صرف کرتے ہیں، کیا میں واقعی ان کے وقت کا حق ادا کر رہا ہوں؟
یہی سوال درحقیقت منبر کی عظمت، خطابت کی دیانت اور خطیب کی حقیقی ذمہ داری کو سمجھنے کی پہلی شرط ہے۔
اس حقیقت کو ایک مثال کے ذریعے سمجھنے کی کوشش کیجیے۔ اگر کسی مجلس میں ایک ہزار افراد موجود ہوں اور خطیب ایک گھنٹے خطاب کرے تو بظاہر اس نے صرف ایک گھنٹہ صرف کیا، لیکن حقیقت میں قوم کے ایک ہزار گھنٹے اس کے خطاب پر صرف ہوئے۔ اگر سامعین کی تعداد دس ہزار ہو تو ایک گھنٹے کا خطاب دس ہزار انسانی گھنٹوں کے برابر ہو جاتا ہے۔
ذرا ٹھہر کر سوچیے! یہ ہزاروں گھنٹے دراصل ہزاروں انسانوں کی زندگی کے قیمتی لمحات ہیں، جو انہوں نے آپ کے علم، گفتگو اور رہنمائی پر اعتماد کرتے ہوئے آپ کے سپرد کیے ہیں۔ اب یہ خطیب کی اخلاقی اور علمی ذمہ داری ہے کہ وہ اس اجتماعی امانت کا حق ادا کرے۔ اسے اس بات کا احساس ہونا چاہیے کہ وہ صرف اپنا ایک گھنٹہ نہیں گزار رہا، بلکہ ہزاروں انسانوں کی زندگی کا قیمتی وقت اس کے سامنے ہے۔ لہٰذا اس کے ہر لفظ، ہر جملے اور ہر لمحے کا کوئی نہ کوئی علمی، فکری یا اصلاحی مصرف ہونا چاہیے۔
وقت محض گھڑی کی سوئیوں کی حرکت کا نام نہیں، بلکہ یہ انسانی زندگی کا وہ قیمتی سرمایہ ہے جس کا ہر گزرتا لمحہ کبھی واپس نہیں آتا۔ چنانچہ خطیب کے لیے ضروری ہے کہ وہ سامعین کے وقت کو اپنی ذاتی سہولت نہیں، بلکہ ایک اجتماعی امانت سمجھے۔ اس امانت کا تقاضا ہے کہ اس کی گفتگو سامعین کے علم میں اضافہ کرے، فکر کو وسعت دے، شعور کو بیدار کرے اور کردار کی اصلاح کا ذریعہ بنے۔
غیر ضروری تمہیدات، بے مقصد طوالت، ایک ہی بات کی بار بار تکرار اور موضوع سے غیر متعلق گفتگو نہ صرف خطاب کی تاثیر کو کم کرتی ہیں، بلکہ ان قیمتی لمحات کی حق تلفی کا بھی سبب بنتی ہیں جو سامعین نے پورے اعتماد کے ساتھ خطیب کے سپرد کیے ہوتے ہیں۔ خطیب کو یاد رکھنا چاہیے کہ منبر پر اس کی ذمہ داری زیادہ سے زیادہ بولنا نہیں، بلکہ کم سے کم وقت میں زیادہ سے زیادہ علمی و فکری فائدہ پہنچانا ہے۔
مجلس کی کامیابی کا معیار یہ نہیں کہ خطیب نے کتنی دیر تقریر کی، بلکہ اصل معیار یہ ہے کہ سامعین اس مجلس سے کیا سیکھ کر اٹھے۔ بسا اوقات تیس منٹ کی بامقصد گفتگو دو گھنٹے کی بے ترتیب تقریر سے زیادہ مفید ثابت ہوتی ہے۔ اس لیے خطیب کو چاہیے کہ منبر پر آنے سے پہلے مناسب مطالعہ اور تیاری کرے، موضوع کا حق ادا کرے اور مقررہ وقت کے اندر اپنی گفتگو مکمل کرنے کی کوشش کرے۔
یہ بات بھی پیشِ نظر رہنی چاہیے کہ سامعین صرف اپنا وقت نہیں دیتے، بلکہ خطیب پر اعتماد بھی کرتے ہیں۔ لہٰذا بیان کیے جانے والے واقعات، احادیث اور تاریخی حقائق کی صحت کا خیال رکھنا بھی اسی امانت کا ایک اہم تقاضا ہے۔ کسی غیر مستند روایت یا غیر ثابت شدہ واقعے کو بیان کرنے سے نہ صرف علمی اعتبار سے نقصان پہنچتا ہے، بلکہ سامعین کے اعتماد کو بھی ٹھیس پہنچ سکتی ہے۔
ایک خطیب کا ایک گھنٹہ بسا اوقات ہزاروں انسانوں کی زندگی کے ہزاروں گھنٹوں کے برابر ہوتا ہے۔ اس لیے منبر سے وابستہ ہر شخص کو اس حقیقت کا احساس ہونا چاہیے کہ وہ محض تقریر نہیں کر رہا، بلکہ ایک اجتماعی امانت کا امین ہے۔
خطاب کے اختتام پر اسے اپنے آپ سے صرف یہ نہیں پوچھنا چاہیے کہ میں نے آج کتنا اچھا خطاب کیا، بلکہ اسے یہ بھی سوچنا چاہیے کہ جن لوگوں نے اپنی زندگی کا قیمتی وقت میرے سپرد کیا، کیا میں نے ان کے وقت کا حق ادا کیا؟
چند عملی اصول
اس اہم ذمہ داری کو نبھانے کے لیے ہر ذاکر اور خطیب کو چند اصول اپنے لیے لازم کر لینے چاہئیں:
۱۔ وقت کی پابندی: مجلس کے لیے جتنا وقت مقرر کیا گیا ہو، حتی الامکان اسی کے اندر خطاب مکمل کیا جائے۔
۲۔ موضوع کا تعین: منبر پر آنے سے پہلے موضوع، اس کے بنیادی نکات اور گفتگو کی ترتیب طے کر لی جائے تاکہ خطاب منتشر ہونے سے محفوظ رہے۔
۳۔ علمی تیاری: ہر روایت، واقعے اور تاریخی حوالے کی تحقیق کی جائے اور غیر مستند باتوں کے بیان سے اجتناب کیا جائے۔
۴۔ غیر ضروری تکرار سے پرہیز: کسی بات کو محض وقت پورا کرنے یا تقریر میں طوالت پیدا کرنے کے لیے بار بار نہ دہرایا جائے۔
۵۔ علمی و اصلاحی افادیت: ہر مجلس میں سامعین کے لیے کوئی واضح علمی نکتہ، فکری پیغام یا عملی نصیحت ضرور پیش کی جائے۔
۶۔ آن لائن سامعین کا لحاظ: اس حقیقت کو پیشِ نظر رکھا جائے کہ خطاب صرف سامنے بیٹھے افراد تک محدود نہیں، بلکہ دنیا بھر میں اسے سننے والے افراد بھی اپنا وقت اور اعتماد خطیب کے سپرد کر رہے ہوتے ہیں۔
ہر خطیب کو منبر سے اترتے وقت اپنے ضمیر کے سامنے یہ سوال ضرور رکھنا چاہیے کہ کیا میں نے سامعین کے قیمتی وقت کا حق ادا کیا؟ کیا میری گفتگو ان کے علم میں اضافے، فکر کی بیداری اور کردار کی اصلاح کا ذریعہ بنی؟
کیونکہ منبر کی ذمہ داری محض اپنی بات کہہ دینے سے پوری نہیں ہوتی، بلکہ اس وقت پوری ہوتی ہے جب سامعین مجلس سے کچھ سیکھ کر، کچھ سمجھ کر اور اپنی زندگی میں کسی مثبت تبدیلی کا عزم لے کر واپس جائیں۔
منبر کا حق یہی ہے کہ وہاں صرف الفاظ صرف نہ ہوں، بلکہ ہر لمحہ علم و آگہی کے فروغ اور اصلاحِ معاشرہ کے لیے وقف ہو۔
آپ کا تبصرہ